دل کو ہر حال میں مصروف دعا رکھا ہے
میں نے یہ جرم بھی اپنے پہ روا رکھا ہے
میری ہر سانس رسولوں کی زباں ہے جیسے
میں نے ہر سانس میں اک حرف وفا رکھا ہے
آپ تو گرمیٔ حالات سے گھبراتے ہیں
ہم نے سورج کو بھی سینے میں چھپا رکھا ہے
آگہی گرم سفر ہے نئی منزل کی طرف
چاند کا ذکر ہی کیا چاند میں کیا رکھا ہے
ہم کہ حالات کی تصویر بتانے والے
ہم کو حالات نے تصویر بنا رکھا ہے
زندگی سے کہو اب کوئی تقاضہ نہ کرے
میں نے ہر غم کو کلیجے سے لگا رکھا ہے
جس جگہ قافلۂ درد رکا تھا خسروؔ
درد مندوں نے وہیں شہر بسا رکھا ہے
امیر احمد خسرو
Dil ko har haal mein masroof-e-dua rakha hai
Maine ye jurm bhi apne pe rawa rakha hai
Meri har saans rasoolon ki zabaan hai jaise
Maine har saans mein ik harf-e-wafa rakha hai
Aap to garmi-e-haalaat se ghabraate hain
Hum ne sooraj ko bhi seene mein chhupa rakha hai
Aagahi garam safar hai nayi manzil ki taraf
Chaand ka zikr hi kya, chaand mein kya rakha hai
Hum ke haalaat ki tasveer bataane waale
Hum ko haalaat ne tasveer bana rakha hai
Zindagi se kaho ab koi taqaza na kare
Maine har gham ko kaleje se laga rakha hai
Jis jagah qaafla-e-dard ruka tha Khusrau
Dard-mandon ne wahin shehar basa rakha hai
